खुनाच्या प्रयत्नातील दोन आरोपींना अहिल्यानगर जिल्ह्यातून अटक; बारामती तालुक्यातील गुन्ह्यातील आरोपींच्या अहिल्यानगर जिल्ह्यात मुसक्या आवळल्या

बारामती, दि. १३ (बारामती संचार वृत्तपत्र) बारामती तालुक्यातील जळोची एमआयडीसी येथे खुनाचा प्रयत्न केल्याप्रकरणी स्थानिक गुन्हे शाखा पुणे ग्रामीण आणि बारामती तालुका पोलिसांनी संयुक्त कारवाई करत दोन आरोपींना अहिल्यानगर जिल्ह्यातील रुई छत्तीसी येथून अटक केली आहे. या कारवाईमुळे परिसरात मोठी खळबळ उडाली आहे.
काय आहे प्रकरण?
दि. ९ ऑक्टोबर रोजी रात्री सुमारे पावणे नऊच्या सुमारास जळोची येथील एका पानशॉपवर फिर्यादी थांबले असताना आरोपी गणेश माने, प्रथमेश गवळी, विनोद जाधव आणि इतर चार अनोळखी इसम मोटारसायकलवरून तिथे आले. त्यांनी फिर्यादीला “तू गणेश वाघमोडे याच्यासोबत का फिरतोस? माझी माफी माग!” असे म्हणून धमकावले. यावेळी आरोपी प्रथमेश गवळी याने “याला ठेवायचे नाही” असे म्हणत त्याच्याजवळील कोयत्याने फिर्यादीवर जीवे मारण्याचा प्रयत्न केला. त्यानंतर आरोपींनी “आम्ही इथले भाई आहोत” असे म्हणत कोयता हवेत फिरवत घटनास्थळावरून पळ काढला.

तातडीने पथक तयार करून कारवाई
या घटनेचे गांभीर्य लक्षात घेऊन पोलीस अधीक्षक डॉ. संदीपसिंह गिल्ल यांनी आरोपींना तातडीने अटक करण्याचे निर्देश दिले. त्यानुसार, स्थानिक गुन्हे शाखेचे पोलीस निरीक्षक अविनाश शिळीमकर आणि बारामती तालुका पोलीस ठाण्याचे पोलीस निरीक्षक चंद्रशेखर यादव यांच्या मार्गदर्शनाखाली एक विशेष तपास पथक तयार करण्यात आले.
अटक आरोपीचा मागील इतिहास
या घटनेतील मुख्य आरोपींपैकी एक असलेला जयेश माने याने गेल्या वर्षी बारामती शहरात साथीदारांसह एका खुनाच्या गुन्ह्यात सहभाग घेतला होता आणि दीड महिन्यापूर्वीच तो कारागृहातून सुटला होता, अशी माहिती पोलिसांनी दिली आहे. या दोन्ही गटांच्या आरोपींमध्ये जुलै २०२३ मध्येही वाद झाला होता. त्यावेळी जयेश माने याला मारहाण झाली होती आणि त्याच्या फिर्यादीवरून गणेश वाघमोडे, गौरव सूळ व इतरांवर खुनाचा प्रयत्न केल्याचा गुन्हा दाखल करण्यात आला होता.
गुप्त माहितीच्या आधारे अटक
तपासादरम्यान गुप्त बातमीदारामार्फत आरोपी अहिल्यानगर जिल्ह्यातील रुई छत्तीसी येथे असल्याची माहिती पोलिसांना मिळाली. त्यानुसार पोलिसांनी अत्यंत शिताफीने व नियोजनबद्ध कारवाई करून खुनाच्या प्रयत्नातील दोन आरोपींच्या मुसक्या आवळल्या.
कारवाई करणारे पथक
पोलीस अधीक्षक डॉ. संदीपसिंह गिल्ल, अपर पोलीस अधीक्षक गणेश बिरादार, उपविभागीय पोलीस अधिकारी सुर्दशन राठोड, स्थानिक गुन्हे शाखेचे पोलीस निरीक्षक अविनाश शिळीमकर यांच्या मार्गदर्शनाखाली पोलीस निरीक्षक चंद्रशेखर यादव, सहाय्यक पोलीस निरीक्षक विक्रम पवार, पोलीस उपनिरीक्षक अमोल कदम, ग्रेड पोलीस उपनिरीक्षक बाळासाहेब कारंडे, सहा. फौजदार एस. जे. वाघ, पो. हवा. खारतोडे, पो. हवा. स्वप्नील अहिवळे, स्था. गु. शाखा पुणे ग्रामीण पो. शि. होळंबे, शकील शेख आदींनी ही यशस्वी कामगिरी पार पाडली.
पुढील तपास सहाय्यक पोलीस निरीक्षक विक्रम पवार करत आहेत.