एमआयडीसीचा रिलायन्सला दणका! कोट्यवधींचा भूखंड परत ताब्यात, नियमांची पायमल्ली भोवली
बारामती हादरली! महाराष्ट्र औद्योगिक विकास महामंडळाने (एमआयडीसी) आज (दि. ८) मोठी कारवाई करत मे. रिलायन्स एअरपोर्ट डेव्हलपर्स प्रा. लि. कडून कोट्यवधी रुपयांचा भूखंड परत ताब्यात घेतला आहे. भाडेपट्टा करारनाम्यातील अटी व शर्तींचा भंग केल्यामुळे एमआयडीसीने हा कठोर निर्णय घेतला आहे. या कारवाईमुळे बारामतीच्या औद्योगिक क्षेत्रात खळबळ उडाली आहे.
मिळालेल्या माहितीनुसार, एमआयडीसीने रिलायन्स एअरपोर्ट डेव्हलपर्स प्रा. लि. यांना ५ नोव्हेंबर २००९ रोजी भाडेपट्टा करारानुसार भूखंड दिला होता. मात्र, कंपनीने या करारातील नियमांना वारंवार तिलांजली दिली. याची गंभीर दखल घेत एमआयडीसीने १६ जानेवारी २०२५ रोजी रिलायन्सला भूखंड करार रद्द करण्याची अंतिम नोटीस बजावली होती. या नोटिसीलाही कंपनीने जुमानले नाही.
त्यामुळे आज एमआयडीसीच्या अधिकाऱ्यांनी घटनास्थळी धाव घेत पंचनामा केला आणि भूखंडाचा ताबा अधिकृतपणे आपल्या ताब्यात घेतला. या कारवाईमुळे रिलायन्स एअरपोर्ट डेव्हलपर्स प्रा. लि. ला मोठा झटका बसला आहे. कंपनीच्या भविष्यातील योजनांवर याचा काय परिणाम होतो, हे पाहणे महत्त्वाचे ठरणार आहे.
एमआयडीसीचे बारामती प्रादेशिक कार्यालयाचे प्रादेशिक अधिकारी हनुमंत पाटील यांनी या कारवाईची माहिती प्रसिद्धी पत्रकाद्वारे दिली आहे. त्यांनी स्पष्ट केले की, नियमांचे उल्लंघन करणाऱ्या कोणत्याही कंपनीला एमआयडीसी सोडणार नाही. या कठोर कारवाईमुळे इतर उद्योजकांनाही एक स्पष्ट संदेश गेला आहे की, करारातील अटी व शर्तींचे पालन करणे बंधनकारक आहे.
आता या भूखंडाचे काय होणार, याबाबत एमआयडीसी लवकरच निर्णय घेईल, अशी शक्यता वर्तवली जात आहे. मात्र, रिलायन्सकडून झालेली नियमांची पायमल्ली आणि त्यानंतर एमआयडीसीने घेतलेला ताबा यामुळे बारामतीच्या औद्योगिक वर्तुळात जोरदार चर्चा सुरू आहे.
