ब्रेकिंग न्यूज : शिसुर्फळमध्ये विनापरवाना फटाक्यांचा साठा उघड; ₹८१ हजारांचा मुद्देमाल जप्त
‘शैलेश फटाका मार्ट’च्या गाळ्यावर पोलिसांची धडक कारवाई; पन्नालाल गुंदेचा यांच्याविरुद्ध गुन्हा दाखल
बारामती : दिवाळीच्या काळात विक्रीसाठी आणलेला फटाक्यांचा साठा परवान्याची मुदत संपल्यानंतरही साठवून ठेवल्याचा प्रकार शिसुर्फळ येथे समोर आला आहे. बारामती तालुका पोलिसांनी केलेल्या कारवाईत विविध प्रकारचे फटाके असा तब्बल ₹८१ हजार ५० रुपयांचा मुद्देमाल जप्त केल्याची माहिती FIR मध्ये नमूद आहे. याप्रकरणी पन्नालाल बाबूलाल गुंदेचा यांच्याविरुद्ध Explosives Act, 1884 मधील कलम 9B(1)(b) अन्वये गुन्हा दाखल करण्यात आला आहे.
गोपनीय माहिती अन् पोलिसांची धडक
६ ऑगस्ट रोजी पोलिसांना गोपनीय बातमीदारामार्फत माहिती मिळाली की, शिसुर्फळ येथील ‘शैलेश फटाका मार्ट’मधील गाळ्यात बेकायदेशीर आणि विनापरवाना फटाक्यांचा साठा करण्यात आला आहे. माहिती मिळताच पोलिसांनी पथकासह घटनास्थळी धाव घेतली.
पोलिसांनी गाळा क्रमांक २ मध्ये पाहणी केली असता फटाक्यांचे मोठ्या प्रमाणात बॉक्स आढळून आले. त्यानंतर फटाक्यांच्या विक्री व साठवणुकीचा परवाना तसेच संबंधित कागदपत्रांची चौकशी करण्यात आली.
‘परवाना होता’ पण मुदत संपलेली!
FIR नुसार, संबंधित व्यक्तीने हा फटाक्यांचा साठा सन २०२५ मध्ये दिवाळीच्या विक्रीसाठी आणला असून काही माल शिल्लक राहिल्याचे पोलिसांना सांगितले. सन २०२५ मधील तात्पुरता फटाका विक्री स्टॉलचा परवाना व इतर कागदपत्रेही दाखविण्यात आली.
मात्र, उपविभागीय दंडाधिकारी कार्यालयाकडून माहिती घेतल्यानंतर हा परवाना केवळ १५ दिवसांसाठीच देण्यात आला होता, तसेच त्या परवान्याच्या आधारे फटाक्यांचा साठा करून ठेवता येत नसल्याचे स्पष्ट झाल्याचे FIR मध्ये नमूद आहे.
लाखाचा टप्पा गाठणारा साठा थोडक्यात हुकला!
पोलिसांच्या नोंदीनुसार जप्त करण्यात आलेल्या फटाक्यांमध्ये—
- Vankatesh Fireworks, Terkheda — दोन इंची तोफ: २२४ बॉक्स — ₹४४,८००
- ३० शॉट फटाके: ३० बॉक्स — ₹२२,५००
- Saddam Atom Bomb: २७ बॉक्स — ₹१३,७५०
असा एकूण ₹८१,०५० किमतीचा फटाका साठा जप्त करण्यात आला आहे.
अग्निशामक यंत्रही नव्हते?
FIR मध्ये आणखी गंभीर बाब नमूद करण्यात आली आहे. फटाक्यांचा साठा मानवी जीवितास धोका निर्माण होईल अशा परिस्थितीत ठेवण्यात आला होता आणि संबंधित ठिकाणी अग्निशामक यंत्र ठेवण्यात आलेले नव्हते, असे पोलिसांच्या तक्रारीत नमूद आहे.
पंचांसमक्ष फटाक्यांचा पंचनामा करून मुद्देमाल ताब्यात घेण्यात आला. या प्रकरणाचा पुढील तपास पोलीस हवालदार राम हरी भोसले करीत आहेत.
