मुर्टी, कोऱ्हाळ्यात जुगार अड्डे सुरूच? वडगाव निंबाळकर पोलिसांच्या कारवाईवर प्रश्नचिन्ह!

छापे पडले, गुन्हे दाखल झाले; मग जुगार अड्डे बंद का होत नाहीत? वरिष्ठ पोलीस अधिकाऱ्यांनी लक्ष घालण्याची मागणी

बारामती : बारामती तालुक्यातील मुर्टी आणि कोऱ्हाळे बुद्रुक परिसरातील कथित जुगार अड्ड्यांवर पोलिसांनी कारवाई केल्याची नोंद FIR मध्ये आहे. मात्र, या कारवायांनंतरही संबंधित ठिकाणी जुगार सुरूच असल्याची माहिती समोर येत असल्याने पोलिसांच्या कारवाईच्या परिणामकारकतेवर प्रश्नचिन्ह उपस्थित होत आहे. केवळ छापे टाकून काही जणांवर गुन्हे दाखल करायचे आणि त्यानंतर पुन्हा त्याच ठिकाणी जुगार सुरू राहायचा, असे असेल तर या कारवाईचा नेमका उपयोग काय, असा सवाल उपस्थित होत आहे.

मुर्टीतील कारवाईनंतरही जुगार सुरू असल्याची चर्चा

वडगाव निंबाळकर पोलीस ठाण्यातील FIR क्रमांक ०१६६ नुसार, २६ ऑगस्ट २०२६ रोजी मुर्टी गावातील लोणी-भापकर रोडलगत दिलीप चव्हाण यांच्या पोल्ट्री फार्मच्या शेडजवळ तीन पानी जुगार खेळला जात असल्याची माहिती पोलिसांना मिळाली होती. त्यानंतर पोलिसांनी छापा टाकून सहा जणांविरुद्ध महाराष्ट्र जुगार प्रतिबंधक अधिनियमाच्या कलम १२(अ) अन्वये गुन्हा दाखल केला. या कारवाईत ४ हजार २५० रुपयांचा मुद्देमाल जप्त करण्यात आला.

मात्र, या कारवाईनंतरही संबंधित परिसरात जुगार सुरू असल्याची माहिती मिळत असल्याने पोलिसांनी केलेल्या कारवाईचा प्रत्यक्ष परिणाम काय झाला, असा प्रश्न उपस्थित होत आहे. जुगार अड्डा कायमस्वरूपी बंद करण्यासाठी पुढील कारवाई झाली का, याचे उत्तर पोलिसांनी द्यावे, अशी मागणी होत आहे.

कोऱ्हाळे बुद्रुकमध्येही कारवाई केवळ कागदावरच?

कोऱ्हाळे बुद्रुक येथील कठीणपूल ते लाटे रोड परिसरात ७ ऑक्टोबर २०२६ रोजी पोलिसांनी कारवाई केल्याची नोंद FIR क्रमांक ०२१६ मध्ये आहे. या कारवाईत चार जणांविरुद्ध गुन्हा दाखल करून १ हजार ६५० रुपयांची रोख रक्कम, पत्त्यांचे दोन कॅट आणि जुगारासाठी वापरलेले पोते जप्त केल्याचे नमूद आहे.

मात्र, या कारवाईनंतरही परिसरातील जुगार अड्डा सुरू असल्याची माहिती समोर येत असेल, तर पोलिसांनी केलेल्या कारवाईचा धाक नेमका कुठे आहे, असा सवाल उपस्थित होत आहे. कारवाईनंतर संबंधित ठिकाणी पुन्हा पाहणी करण्यात आली का? जुगार सुरू असल्याच्या तक्रारींची दखल घेतली जात आहे का? या प्रश्नांची उत्तरे मिळणे आवश्यक आहे.

उपविभागीय पोलीस अधिकाऱ्यांनी लक्ष घालावे!

मुर्टी आणि कोऱ्हाळे बुद्रुक परिसरातील जुगार अड्ड्यांबाबतच्या तक्रारींची वरिष्ठ पोलीस अधिकाऱ्यांनी गांभीर्याने दखल घ्यावी, अशी मागणी होत आहे. वडगाव निंबाळकर पोलीस ठाण्याच्या हद्दीत संबंधित ठिकाणांची प्रत्यक्ष पाहणी करून जुगार सुरू असल्याच्या तक्रारींची शहानिशा करावी. तसेच, जुगार सुरू असल्याचे आढळल्यास संबंधित कायद्यानुसार कारवाई करावी.

उपविभागीय पोलीस अधिकारी चैतन्य कदम यांनी या प्रकरणात लक्ष घालून दोन्ही ठिकाणांवरील कारवाईचा आढावा घ्यावा, अशी मागणी पुढे येत आहे.

छापे टाकणे आणि गुन्हे दाखल करणे एवढ्यापुरतीच कारवाई मर्यादित राहणार, की जुगार अड्डे कायमस्वरूपी बंद करण्यासाठी सातत्यपूर्ण प्रयत्न होणार? मुर्टी आणि कोऱ्हाळे बुद्रुक येथील तक्रारींची वस्तुस्थिती काय आहे? या प्रश्नांची उत्तरे आता पोलीस प्रशासनाकडून अपेक्षित आहेत.

‘बारामती संचार’चा सवाल : कारवाईची नोंद झाली; पण जुगार अड्डे बंद झाले का?