बारामती नगरपरिषदेत ‘माहिती अधिकार दिवस’ उत्साहात साजरा!

बारामती: माहितीचा अधिकार अधिनियम, २००५ हा कायदा देशभरात १२ ऑक्टोबर २००५ पासून लागू करण्यात आला आहे. आंतरराष्ट्रीय स्तरावर २८ सप्टेंबर हा दिवस ‘माहिती अधिकार दिवस’ म्हणून साजरा केला जातो. यावर्षी २८ सप्टेंबर रोजी रविवार आल्याने बारामती नगरपरिषदेने सोमवार, दिनांक २९ सप्टेंबर २०२५ रोजी ‘माहिती अधिकार दिवस’ उत्साहात साजरा केला.
माहितीचा अधिकार अधिनियम, २००५ च्या तरतुदी आणि कार्यपद्धतींना व्यापक प्रसिद्धी देण्यासाठी नगरपरिषदेच्या वतीने विविध उपक्रम राबवण्यात आले.
विशेष व्याख्यानाचे आयोजन
या निमित्ताने नगरपरिषदेच्या शरदचंद्र पवार सभागृहामध्ये ‘माहिती अधिकार अधिनियम, २००५’ या विषयावर विशेष व्याख्यानाचे आयोजन करण्यात आले होते. तुळजाराम चतुरचंद महाविद्यालय, बारामती येथील राज्यशास्त्र विभागाचे प्राध्यापक डॉ. कैलास बद्रीनाथ मांटे यांनी नगरपरिषदेचे अधिकारी व कर्मचारी यांना मोलाचे व माहितीपूर्ण मार्गदर्शन केले. त्यांचे व्याख्यान अत्यंत माहितीपूर्ण आणि प्रेरणादायी होते.
कार्यक्रमाची सुरुवात मुख्याधिकारी श्री. पंकज अनिल भुसे यांनी डॉ. कैलास मांटे यांचे स्वागत करून केली. कार्यक्रमाचे प्रास्ताविक कार्यालय अधीक्षक श्री. संजय चव्हाण यांनी केले, तर व्याख्याते डॉ. मांटे यांचा अल्पपरिचय श्रीम. नीलम काशिद यांनी करून दिला. उपमुख्याधिकारी श्री. गोरक्षनाथ वायाळ यांनी उपस्थितांचे आभार मानले.
शाळांमध्ये जनजागृती उपक्रम
माहितीच्या अधिकाराबद्दल जनजागृती करण्याच्या उद्देशाने नगरपरिषदेच्या शाळांमध्येही विशेष उपक्रम राबवण्यात आले. नगरपरिषदेच्या शाळा क्र. १ ते ८ मध्ये परिपाठात माहिती अधिकार अधिनियम, २००५ विषयी माहिती देण्यात आली. तसेच, या शाळांमध्ये चित्रकला स्पर्धा, निबंध स्पर्धा, वक्तृत्व स्पर्धा, हस्ताक्षर स्पर्धा इत्यादींचे आयोजन करण्यात आले होते, ज्याला विद्यार्थी-विद्यार्थिनींनी चांगला प्रतिसाद दिला.
पुस्तक प्रदर्शनाला वाचकांचा प्रतिसाद
याशिवाय, बारामती नगरपरिषदेच्या कविवर्य मोरोपंत वाचनालयामध्ये माहिती अधिकाराशी संबंधित विविध पुस्तकांचे प्रदर्शन आयोजित करण्यात आले होते. वाचनालयातील या माहितीपूर्ण प्रदर्शनलाही वाचकांनी चांगला प्रतिसाद दिला.
अशा प्रकारे विविध उपक्रम आयोजित करून बारामती नगरपरिषदेने माहिती अधिकार दिवस साजरा केला.