बारामतीत ध्वनिप्रदूषणावर पोलिसांचा ‘रोलर’; अवैध बुलेट सायलेन्सर नष्ट!
बारामती: बारामती शहर पोलिसांनी शहरातील ध्वनिप्रदूषणाला लगाम घालण्यासाठी मोठी कारवाई केली आहे. पोलिसांनी धडक कारवाई करत बुलेट मोटरसायकलला लावण्यात येणारे मोठ्या आवाजाचे अनेक बनावट सायलेन्सर जप्त केले. शहरातील मध्यवर्ती भिगवण चौकात हे सर्व सायलेन्सर आणून रॉलरखाली चिरडून नष्ट करण्यात आले.
शहरातील अनेक नागरिक बुलेटच्या मोठ्या आवाजाने त्रस्त झाले होते. रात्रीच्या वेळी या गाड्यांच्या कर्कश आवाजामुळे नागरिकांची झोपमोड होत असल्याच्या तक्रारी पोलिसांना सातत्याने मिळत होत्या. या पार्श्वभूमीवर बारामती शहर पोलिसांनी उपविभागीय पोलीस अधिकारी डॉ. सुदर्शन राठोड यांच्या मार्गदर्शनाखाली विशेष मोहीम राबवली. पोलिसांनी शहरातील संवेदनशील भागांमध्ये नाकाबंदी करून बुलेट गाड्यांची कसून तपासणी केली. कंपनीने प्रमाणित केलेले नसलेले आणि मोठा आवाज करणारे बनावट सायलेन्सर लावलेल्या दुचाकी जप्त करण्यात आल्या.
पोलिसांनी जप्त केलेले अवैध सायलेन्सर मोठ्या संख्येने होते. कोणताही विलंब न करता, सार्वजनिक ठिकाणीच हे सर्व सायलेन्सर मोठ्या रॉलरखाली नष्ट करण्यात आले. पोलिसांच्या या कारवाईमुळे बुलेटच्या कर्णकर्कश आवाजाने त्रस्त नागरिकांनी समाधान व्यक्त केले आहे.
या कारवाईची माहिती देताना बारामती शहर वाहतूक शाखेचे पोलीस निरीक्षक चंद्रकांत यादव म्हणाले, “ध्वनिप्रदूषण करणाऱ्या व्यक्तींवर यापुढेही कठोर कारवाई केली जाईल. नागरिकांनी वाहतूक नियमांचे पालन करावे आणि वाहनांमध्ये अनधिकृत बदल करू नयेत.” असे आवाहन त्यांनी केले. बारामती पोलिसांच्या या प्रभावी कारवाईमुळे शहरातील ध्वनिप्रदूषणाची समस्या कमी होण्याची शक्यता आहे.
