बारामतीत गोळीबार आणि सत्तूरने वार करून जीवे मारण्याचा प्रयत्न; दोघांविरुद्ध गुन्हा दाखल

पालखी महामार्गावरील पायलट ढाब्याजवळील घटना; दुचाकीवरून आलेल्या दोन अनोळखी इसमांचा सहभाग असल्याची फिर्याद

बारामती | प्रतिनिधी

बारामती तालुक्यातील पालखी महामार्गावर विमानतळ रेल्वे पुलाच्या पुढे कटफळच्या दिशेकडून पायलट ढाब्याजवळ आलेल्या दोन अनोळखी इसमांनी एका व्यक्तीवर पिस्तुलातून गोळीबार करून तसेच सत्तूरने वार करून जीवे मारण्याचा प्रयत्न केल्याची धक्कादायक घटना १८ ऑक्टोबर २०२६ रोजी सायंकाळी सुमारे ७.१० वाजण्याच्या सुमारास घडल्याची फिर्याद बारामती तालुका पोलीस ठाण्यात दाखल झाली आहे.

या प्रकरणी बारामती तालुका पोलीस ठाण्यात गुन्हा रजिस्टर क्रमांक ५२१/२०२६ अन्वये भारतीय न्याय संहिता कलम १०९(१), ११८(१), ११८(२), ११५(२), ३(५) तसेच शस्त्र अधिनियमातील संबंधित कलमांनुसार गुन्हा दाखल करण्यात आला आहे.

भेटवस्तू देण्याच्या बहाण्याने जवळ येऊन हल्ला केल्याचा आरोप

पोलिसांत दाखल फिर्यादीनुसार, फिर्यादी आणि राणा दिलीप सूर्यवंशी हे पालखी महामार्गावरील विमानतळ रेल्वे पुलाच्या पुढे पायलट ढाब्याजवळ उभे होते. त्यावेळी कटफळच्या बाजूकडून स्कूटरवरून दोन अनोळखी इसम तेथे आले. त्यापैकी मागे बसलेल्या, अंगात जॅकेट आणि चेहऱ्यावर मास्क घातलेल्या इसमाने राणा दिलीप सूर्यवंशी यांना बुके देण्याचा बहाणा केला.

त्यानंतर संबंधित इसमाने पिस्तुलातून गोळीबार केल्याचा आणि सत्तूरने वार केल्याचा आरोप फिर्यादीने केला आहे. या हल्ल्यात राणा दिलीप सूर्यवंशी यांच्या उजव्या हाताच्या दंडाला तसेच पोटाच्या उजव्या बाजूला गंभीर दुखापत झाल्याचे फिर्यादीत नमूद आहे.

दोघेही अनोळखी; पोलिसांकडून तपास

या घटनेनंतर मास्क घातलेल्या हल्लेखोरासह स्कूटर चालवणाऱ्या दुसऱ्या अनोळखी इसमाविरुद्ध कायदेशीर कारवाई करण्याची मागणी फिर्यादीने केली आहे.

या प्रकरणाची नोंद १९ ऑक्टोबर २०२६ रोजी पहाटे ३.०५ वाजता करण्यात आली. मपोसई भगत यांनी गुन्हा दाखल केला असून, पोलीस निरीक्षक नारायण पवार हे पुढील तपास करीत आहेत.

घटनेमागील नेमके कारण, हल्लेखोरांची ओळख आणि त्यांचा शोध याबाबत तपासातून अधिक माहिती समोर येण्याची अपेक्षा आहे.