देऊळगाव गाडा येथे ‘महाराष्ट्र कृषी दिन’ उत्साहात साजरा: शेतकऱ्यांना मिळाले मार्गदर्शन
दौंड, ०१ जुलै २०२५: आज मंगळवार, दिनांक ०१ जुलै २०२५ रोजी दौंड तालुक्यातील देऊळगाव गाडा गावात ऍग्रीकल्चरल डेव्हलपमेंट ट्रस्ट संचलित कृषी विज्ञान केंद्र, बारामती यांच्या वतीने ‘महाराष्ट्र कृषी दिन’ कार्यक्रमाचे आयोजन करण्यात आले होते. या कार्यक्रमाला परिसरातील शेतकऱ्यांनी मोठ्या संख्येने उपस्थिती लावली.
कार्यक्रमाच्या सुरुवातीला कृषी विज्ञान केंद्र, बारामतीचे प्रमुख व वरिष्ठ शास्त्रज्ञ डॉ. धीरज शिंदे यांनी उपस्थित सर्व शेतकरी बांधवांना कृषी दिनाच्या हार्दिक शुभेच्छा दिल्या. तसेच, केंद्रातर्फे सुरू असलेल्या विविध उपक्रमांची माहिती देत शेतकऱ्यांना सखोल मार्गदर्शन केले.
याप्रसंगी केंद्रातील विषय विशेषज्ञ, पशुसंवर्धन विभागाचे डॉ. रतन जाधव यांनी कृषी दिनानिमित्त शेतकऱ्यांना विविध पिकांच्या लागवडीबद्दल आणि व्यवस्थापनाबद्दल मोलाचे मार्गदर्शन केले. तसेच, बीएएसएफ कंपनीचे प्रतिनिधी श्री. चैतन्य टेकाळे यांनी शेतकऱ्यांना कीटकनाशके सुरक्षितपणे कशी हाताळावीत आणि त्यांचा योग्य वापर कसा करावा, याबद्दल प्रात्यक्षिकासह माहिती दिली.
कृषी दिनानिमित्त कृषी विज्ञान केंद्रातर्फे शेतकऱ्यांना वृक्षारोपणासाठी कलमी केशर आंब्याची रोपे बांधावर लावण्यासाठी वाटप करण्यात आली. या प्रसंगी वृक्षारोपण करून पर्यावरण संवर्धनाचा संदेशही देण्यात आला.
कार्यक्रमाच्या शेवटी, देऊळगाव गाडा येथील सरपंच श्री. राजवर्धन जगताप यांनी सर्व पाहुण्यांचे आभार मानले. डॉ. शिंदे आणि इतर तज्ज्ञांनी केलेल्या मार्गदर्शनानुसार गावातील शेतकरी आपल्या शेतीत निश्चितच अमुलाग्र बदल घडवतील, असे आश्वासन देऊन त्यांनी कार्यक्रमाची सांगता केली.
या संपूर्ण कार्यक्रमाचे यशस्वी आयोजन प्रकल्प सहाय्यक श्री. वैभव घाडगे यांनी केले.
