दारूच्या नशेत टिपर चालकाचा धुमाकूळ! थांबलेल्या स्कूल बसला चिरडले; बारामतीत कायदा-सुव्यवस्थेचे तीनतेरा

बारामती ( बारामती संचार वृत्तपत्र) : दारूच्या नशेत असलेल्या एका बेफिकीर टिपर चालकाने बारामती-पाटस रस्त्यावर अक्षरशः धुमाकूळ घातला. ३० सप्टेंबर २०२५ रोजी सायंकाळी ४:३० वाजताच्या सुमारास, शाहू हायस्कूलजवळ, भरधाव वेगात येणाऱ्या टिपरने रस्त्याच्या कडेला थांबलेल्या स्कूल बसला जोरदार धडक दिली आणि तिला काही अंतर फरफटत नेले. हा भीषण अपघात टिपर चालकाच्या अतिरेकी निष्काळजीपणाचा आणि मद्यपानाचा परिणाम आहे.
चिंताजनक कृत्य आणि गुन्हे दाखल
या घटनेनंतर बारामती शहर पोलीस ठाण्यात तनिष्क रोबेन गायकवाड (वय २२, रा. वसंतनगर, बारामती) या टिपर चालकाविरुद्ध गुन्हा (गु.र.नं. ३५१/२०२५) दाखल करण्यात आला आहे. फिर्यादी, स्कूल बसचे मालक गजानन कृष्णा लगोर्ट (वय ३२), यांच्या तक्रारीनुसार आरोपीने केवळ वाहतूक नियमांचे उल्लंघन केले नाही, तर मद्यपान करून (कलम १८५ मो वा क) धोकादायक पद्धतीने वाहन चालवत (कलम १८४ मो वा क) हा गुन्हा केला.
टिपर चालकाची मनमानी
आरोपी तनिष्क गायकवाड हा एमएच १० सीसी ३४९-१ (तात्पुरता नंबर) क्रमांकाचा भारत बन्ज हायवा टिपर चालवत होता. त्याने रहदारीच्या नियमांकडे पूर्णपणे दुर्लक्ष करून हा टिपर अत्यंत भरधाव वेगात चालवला. या अविचारी कृतीमुळे, रस्त्याच्या कडेला थांबलेल्या एमएच ४२ बी ०२१२ या टाटा मॅजिक स्कूल बसला जोरदार धडक बसली. टिपरच्या धडकेने बसचे ड्रायव्हर बाजूचे मोठे नुकसान झाले, तसेच बस पुढे फरफटली गेल्याने लाखो रुपयांचे नुकसान झाले.

हा केवळ अपघात नसून, दारूच्या नशेत सार्वजनिक मार्गावर जीवित आणि वित्तहानी करण्याचा प्रयत्न आहे. या कृत्यामुळे त्याच्यावर भारतीय न्याय संहितेतील (BNS) अत्यंत गंभीर कलमे, जसे की कलम २८१ (सार्वजनिक मार्गाचे नियम तोडणे) आणि कलम ३२४(४) (₹२०,००० ते ₹१ लाख पर्यंत नुकसान पोहोचवणे), लावण्यात आली आहेत.
सुरक्षेचा प्रश्न ऐरणीवर
सायंकाळी शालेय वेळेत घडलेल्या या घटनेमुळे परिसरातील नागरिकांमध्ये मोठी चिंता आणि संताप व्यक्त होत आहे. जर या बसमध्ये विद्यार्थी असते, तर मोठी दुर्घटना घडली असती. मद्यपी आणि बेजबाबदार चालकांवर बारामती पोलीस कडक कारवाई करणार का? वाहतूक पोलिसांकडून शहरात मद्यपान करून वाहन चालवणाऱ्यांवर (ड्रंक अँड ड्राईव्ह) नियमितपणे कारवाई का होत नाही, असा संतप्त सवाल नागरिकांकडून विचारला जात आहे.
या गंभीर गुन्ह्याचा पुढील तपास पोलीस हवालदार कदम हे करत आहेत. कायदा मोडणाऱ्यांना कठोर शिक्षा झालीच पाहिजे, अशी मागणी जोर धरत आहे.